ചെയ്യുന്നവർ അറിയാത്തതും എന്നാൽ ഒപ്പമുള്ളവർക്ക് ഏറ്റവും ശല്യമുള്ളതുമായ ഒരു കാര്യം ഏതാണെന്ന് ചോദിച്ചാൽ ഒറ്റ ഉത്തരമേ ഉള്ളൂ. ഉറങ്ങുമ്പോഴുള്ള കൂർക്കം വലി. ഒരു മുറിയിൽ ഉറങ്ങുമ്പോഴോ ബസിലോ ട്രെയിനിലോ മറ്റോ യാത്ര ചെയ്യുമ്പോഴോ അടുത്തിരിക്കുന്നയാൾ കൂർക്കം വലിച്ചുറങ്ങിയാൽ നമ്മുടെ ആ രാത്രിയും ഉറക്കവും നഷ്ടമാകും. കൂർക്കം വലി ഒരു ഭീകര പ്രശ്നം തന്നെയാണ്.
രസകരമായ കാര്യം എന്താണെന്ന് വെച്ചാൽ, കൂർക്കം വലിയ്ക്കുന്നവർ അത് ഒരിക്കലും സമ്മതിച്ച് തരില്ല എന്നതാണ്. അഥവാ ഇങ്ങനെ ഒരു കാര്യം കൂർക്കം വലിയ്ക്കുന്ന ആളുടെ ശ്രദ്ധയിൽ പെടുത്തിയാൽ ‘ഞാനോ?’ എന്ന മറുചോദ്യമായിരിക്കും ഉണ്ടാകുക. കൂർക്കം വലിയുടെ പേരിൽ പഴി കേൾക്കുന്നവർ നിരവധിയാണ്. അത് നിങ്ങളുടെ പങ്കാളിയാണെങ്കിൽ പോലും ഈ ഒരു കാര്യത്തിൽ അഡ്ജസ്റ്റ് ചെയ്യാൻ ഒരല്പം ബുദ്ധിമുട്ടാണ് പലർക്കും. ‘ശല്യം’ എന്നാണ് മിക്കവരും ഇതിനെ വിളിക്കുന്നത് പോലും. എന്നാൽ ഈ ‘ശല്യത്തെ’ ഒരു ആരോഗ്യപ്രശ്നമായി കാണേണ്ടതാണ്.
ഉറങ്ങുമ്പോൾ ശ്വസനക്രിയയിൽ ഉണ്ടാകുന്ന തടസ്സം മൂലമാണ് ഈ കൂർക്കംവലി ഉണ്ടാകുന്നത്. ശ്വാസോച്ഛ്വാസം നടത്തുന്ന സമയത്ത് വായു കടന്നു പോകുന്ന വഴിയിൽ ഏതെങ്കിലും ഭാഗത്ത് ചെറിയ തടസ്സം ഉണ്ടായാൽ പോലും കൂർക്കംവലിയ്ക്ക് കാരണമാകും. കൂർക്കംവലി ഇല്ലാതാകണമെങ്കിൽ വായുവിന് തടസ്സങ്ങളില്ലാതെ ശ്വാസകോശത്തിൽ പ്രവേശിക്കാൻ കഴിയണം. ശ്വാസം പുറത്തേയ്ക്ക് പോകുമ്പോഴും തടസ്സങ്ങൾ പാടില്ല. മലർന്ന് കിടന്ന് ഉറങ്ങുന്നവരിലാണ് കൂർക്കംവലി കൂടുതലായി കാണപ്പെടുന്നത്. ഈ രീതിയിൽ ഉറങ്ങുമ്പോൾ നാവ് തൊണ്ടയിലേക്കിറങ്ങി ശ്വാസതടസ്സം ഉണ്ടാകുന്നു.
കൂർക്കം വലിക്കുന്നവരുടെ തല ചെരിച്ച് വെച്ചാൽ മതി എന്നൊക്കെ പലരും പറയാറില്ലേ? നാവ് മൂലം ഉണ്ടാകുന്ന ശ്വാസതടസ്സം തൽക്കാലത്തേക്കെങ്കിലും അകറ്റാനാണിത്. കൂർക്കം വലിക്കുമ്പോൾ ഉണ്ടാകുന്ന ശബ്ദത്തിന്റെ ഏറ്റക്കുറച്ചിലുകൾ കേൾക്കുമ്പോൾ പലർക്കും ചിരി വരും. പീപ്പിയിൽ നിന്ന് പുറപ്പെടുന്ന ശബ്ദം മുതൽ പാറയിൽ ചിരട്ടയിട്ട് ഉരസുന്ന ശബ്ദം വരെ പുറപ്പെടാറുണ്ട്. കഴുത്തിന് നല്ല വണ്ണമുള്ളവർ, മൂക്കിൽ ദശ വളരുന്നവർ, ശ്വാസനാളിയിലും അന്നനാളത്തിലും മുഴയുള്ളവർ, തൈറോയ്ഡ് പ്രശ്നമുള്ളവർ, അമിതവണ്ണമുള്ളവർ, മലബന്ധമുളളവർ, പ്രമേഹം, രക്തസമ്മർദ്ദം തുടങ്ങിയ ആരോഗ്യപ്രശ്നം ഉള്ളവർ, അമിതമായി ഭക്ഷണം കഴിച്ചവർ എന്നിവർക്കൊക്കെ കൂർക്കംവലി സാധ്യത കൂടുതലാണ്.
ഏതാണ്ട് 70 ശതമാനം ആളുകളും പല പ്രായത്തിലായി കൂർക്കം വലിക്കാറുണ്ട്. എന്നാൽ കൗമാരക്കാരിൽ പൊതുവെ കൂർക്കംവലി കുറവാണ്. മുപ്പത് വയസ്സിനും അറുപത് വയസ്സിനും ഇടയിലുള്ളവരിലാണ് കൂർക്കംവലി കൂടുതലായി കാണപ്പെടുന്നത്. അതേസമയം വളരെയേറെ പ്രായമായവരിലും കൂർക്കംവലി കുറവാണ്.
കൂർക്കം വലിയെ പിടിച്ച് കെട്ടാൻ എന്തൊക്കെ കാര്യങ്ങൾ ചെയ്യാം?
ചിൻ സ്ട്രാപ്പ് ഉപയോഗിക്കാം. മൂക്കിലൂടെ ശ്വാസം എടുക്കുന്നതിനു പകരം ഉറക്കത്തിൽ വായിലൂടെ ശ്വാസം എടുക്കുമ്പോഴാണ് കൂർക്കംവലി ഉണ്ടാകുന്നത്. ഇത് പരിഹരിക്കാനായി രൂപകൽപന ചെയ്ത ബെൽറ്റ് പോലെയുള്ള ഒരു വസ്തുവാണ് ചിൻ സ്ട്രാപ്പ്. കീഴ്താടിയെയും നാക്കിനെയും തൊണ്ടയിലെ പേശികളെയും ശ്വസനത്തിൽ സഹായിക്കാൻ ചിൻ സ്ട്രാപ്പുകൾ പ്രത്യേക പങ്ക് വഹിക്കുന്നു. ഉറങ്ങുമ്പോൾ ധരിക്കുകയേ വേണ്ടൂ. പാർശ്വഫലങ്ങളൊന്നും ഇല്ല താനും.
കൂർക്കംവലിയും തടിയും തമ്മിൽ വളരെയധികം ബന്ധമുണ്ട്. വണ്ണം കൂടിയവരിൽ ഇടുങ്ങിയ കഴുത്ത് ഉണ്ടാകാനുള്ള സാധ്യത വളരെ കൂടുതലാണ്. ഇത്തരക്കാരിൽ കൂർക്കംവലിയും കൂടുതലായിരിക്കും. അതുകൊണ്ട് തന്നെ വണ്ണം കുറച്ചാൽ ഒരു പരിധിവരെ കൂർക്കം വലിയ്ക്ക് പരിഹാരം കണ്ടെത്താം. വിട്ടുമാറാത്ത മൂക്കടപ്പും ജലദോഷവും കഫക്കെട്ടും ഉള്ളവരിൽ കൂർക്കംവലിയും ഉണ്ടാകും. അതുകൊണ്ട് ഇത്തരം ആരോഗ്യപ്രശ്നങ്ങൾ ഇല്ലെന്ന് ഉറപ്പാക്കണം. നന്നായി ആവി പിടിക്കുന്നത് ജലദോഷം, മൂക്കടപ്പ്, കഫക്കെട്ട് തുടങ്ങിയ അസ്വസ്ഥതകളെ ഇല്ലാതാക്കാൻ സഹായിക്കും. കൂർക്കം വലിയും മദ്യപാനവും തമ്മിൽ ബന്ധമുണ്ട് എന്നാണ് പഠനങ്ങൾ പറയുന്നത്. മദ്യപാനവും പുകവലിയും പതിവാക്കിയവരിൽ കൂര്ക്കംവലിയ്ക്കുള്ള സാധ്യതയും കൂടുതലാണത്രേ. ഈ ശീലങ്ങൾ ഒഴിവാക്കാൻ കഴിയുന്നില്ലെങ്കിൽ ഉറങ്ങുന്നതിന് ഏകദേശം നാല് മണിക്കൂർ മുമ്പെങ്കിലും പുകവലിച്ച് അവസാനിപ്പിച്ച ശേഷം ഉറങ്ങാൻ പോകുന്നതാണ് നല്ലത്. മദ്യപിക്കുന്ന ശീലമുള്ളവർ ആഴ്ചയിൽ രണ്ട് ദിവസമായി കുറയ്ക്കുക.
മലർന്ന് കിടന്ന് ഉറങ്ങുന്ന ശീലമുള്ളവരിൽ കൂർക്കംവലി കൂടുതലാണ്. അതിനാൽ ഈ രീതിയിൽ കിടക്കാതിരിക്കാനുള്ള മാർഗ്ഗങ്ങൾ സ്വീകരിക്കുക. പുറകുവശത്ത് പോക്കറ്റ് ഉള്ള പാന്റ്സോ വസ്ത്രമോ ധരിച്ച് അതിനുള്ളിൽ ഒരു ചെറിയ ബോൾ ഇടുക. ഇങ്ങനെ ഉറങ്ങാൻ പോകുക. മലർന്ന് കിടക്കാനുള്ള പ്രവണത ഉണ്ടാകുമ്പോൾ ഈ ബോൾ സ്വാഭാവികമായും അടിയിലാകുകയും മലർന്ന് കിടക്കാൻ സാധിക്കാതെ വരികയും ചെയ്യുന്നു. പതിയെ വശങ്ങളിലേക്ക് ചെരിഞ്ഞ് ഉറങ്ങും. ഈ വിദ്യ ഒന്നോ രണ്ടോ ആഴ്ച പരീക്ഷിച്ചാൽ സ്വാഭാവികമായും മലർന്ന് കിടന്ന് ഉറങ്ങുന്ന ശീലം മാറ്റിയെടുക്കാവുന്നതാണ്.
കൂർക്കം വലിയ്ക്കുന്നവർ ഉറങ്ങുന്നതിന് രണ്ട് മണിക്കൂർ മുമ്പായി ഭക്ഷണം കഴിക്കുക. വയറ് നിറച്ച് കുത്തിക്കേറ്റി കഴിച്ച ശേഷം ഉറങ്ങാൻ പോയാൽ കൂർക്കംവലിയ്ക്കാനുള്ള സാധ്യതയും കൂടുതലാണ്. എല്ലാ ദിവസവും പതിവായി വ്യായാമം ചെയ്യുന്നത് മുടക്കേണ്ട. വ്യായാമം ശീലമാക്കിയാൽ ശരീരഭാരം താനേ കുറയും. കഴുത്തിലെ പേശികൾക്ക് ആയാസം ലഭിക്കുന്നത് പോലെയുള്ള വ്യായാമങ്ങൾ പരിശീലിക്കാം. ഇത് കൂർക്കംവലി അകറ്റാൻ സഹായിക്കും.