നഗ്നപൂജ തന്നെ ഇവിടെയും മെയിൻ, മലയാലപ്പുഴയിലെ വാസന്തി അമ്മച്ചിയെക്കുറിച്ച്‌ കൂടുതൽ വിവരങ്ങൾ പുറത്ത്‌

പത്തനംതിട്ട മലയാലപ്പുഴയിലെ മന്ത്രവാദിനിയുടെ കൂടുതൽ വിവരങ്ങൾ പുറത്തുവരുന്നു. ദേവകി എന്ന ശോഭന യുവതികളെയും കുട്ടികളെയും ക്രൂരമായി മർദ്ദിക്കുമായിരുന്നെന്ന് നാട്ടുകാർ പറയുന്നു. വാസന്തി മഠത്തിന്റെ പേരിൽ ഇവർ നടത്തിയിരുന്നത് കൊടുംക്രൂരതകളാണ്. ഇവിടെയെത്തുന്ന യുവതികളെ പൂർണന​ഗ്നരാക്കി നിർത്തിയ ശേഷം ചൂരൽ കൊണ്ട് ക്രൂരമായി തല്ലിയിരുന്നു.

ചികിത്സയെന്ന പേരിലായിരുന്നു ശോഭനയുടെ ക്രൂരതകളെല്ലാം. വിവസ്ത്രയാകാൻ തയ്യാറാകാത്ത യുവതികളെ ബലംപ്രയോഗിച്ച് വിവസ്ത്രയാക്കും. ചികിത്സയുടെ ഭാഗമെന്നുപറഞ്ഞ് ശോഭന സ്വയം വിവസ്ത്രയാവുകയും മദ്യപിച്ച് ലക്കുകെട്ട് തുള്ളുകയും ചെയ്യുമായിരുന്നു. ചികിത്സയ്ക്കുൾപ്പടെയുള്ള കാര്യങ്ങൾക്ക് സഹായവുമായി മുന്നിൽ നിന്നിരുന്നത് രണ്ടാം ഭർത്താവ് ഉണ്ണികൃഷ്ണൻ തന്നെയായിരുന്നു. നാൽപ്പത്തൊന്നുകാരനായ ഇയാളെയും പൊലീസ് പിടികൂടിയിട്ടുണ്ട്.

ശോഭനയുടെ മന്ത്രവാദ കേന്ദ്രവുമായി ബന്ധപ്പെട്ട് രണ്ടുപേരെ കാണാതായിട്ടുണ്ടെന്നും ഇവരെ അപായപ്പെടുത്തിയോ എന്ന് സംശയമുണ്ടെന്നും നാട്ടുകാർ പറയുന്നുണ്ട്. തുടക്കത്തിൽ ചെറിയ മന്ത്രവാദ ചികിത്സകളായിരുന്നു ശോഭന നടത്തിയിരുന്നത്. കുറച്ചുനാൾ കഴിഞ്ഞപ്പോൾ കൂടുതൽ ആൾക്കാർ എത്തിത്തുടങ്ങി. ഇതിനായി പ്രത്യേക ഏജന്റുമാരെ നിയോഗിച്ചിരുന്നോ എന്നും സംശയമുണ്ട്.

മന്ത്രവാദ കേന്ദ്രത്തിന്റെ പ്രവർത്തനങ്ങളെപ്പറ്റി നാട്ടുകാർ പലതവണ പരാതിപ്പെട്ടെങ്കിലും നടപടിയെടുക്കാൻ പൊലീസ് തയ്യാറായില്ളെന്നും ആക്ഷേപമുണ്ട്. അന്വേഷണത്തിനായി പൊലീസ് എത്തുമ്പോൾ അവർക്ക് മുന്നിൽ പൂർണനഗ്നയായി ശോഭന എത്തും. അതോടെ ഒന്നിനും ആകാതെ പൊലീസ് സ്ഥലംവിടും. മാനസിക നില തെറ്റിയ ആളെന്ന രീതിയിൽ ഉപദേശിച്ച് വിട്ട സംഭവങ്ങളും ഉണ്ടായിട്ടുണ്ട്. മന്ത്രവാദ കേന്ദ്രത്തിനെതിരെ പരാതി നൽകുന്നവരെ കേസിൽ കുടുക്കാൻ ശ്രമിക്കുകയും ചെയ്തിരുന്നു.

കസ്റ്റഡിയിലെടുത്തശേഷം പൊലീസ് ചില കാര്യങ്ങൾ ചോദിച്ചറിയാൻ ശ്രമിച്ചെങ്കിലും ശോഭന സഹകരിച്ചില്ല. ‘സമയം അടുത്ത് വരുമ്പോൾ പറയാം’ എന്നായിരുന്നു ഈസമയം ശോഭനയുടെ പ്രതികരണം.ശോഭയ്‌ക്കെതിരെ ഉയർന്ന ആരോപണങ്ങൾ പ്രത്യേകം അന്വേഷിക്കും. ഇവരുടെ വീടും പരിസരവും പരിശോധിക്കുന്നമെന്നും പൊലീസ് വ്യക്തമാക്കിയിട്ടുണ്ട്.

യുവജന സംഘടനകളുടെയും നാട്ടുകാരുടെയും ശക്തമായ പ്രതിഷേധത്തിനൊടുവിലാണ് പൊലീസ് ശോഭനയെ അറസ്റ്റുചെയ്തത്.മന്ത്രവാദ കേന്ദ്രം പ്രതിഷേധക്കാർ അടിച്ചുതകർക്കുകയും ചെയ്തു. ശോഭന നടത്തിയ മന്ത്രവാദത്തിനിടെ കുട്ടി ബോധരഹിതനായി വീഴുന്നതിന്റെ ദൃശ്യങ്ങൾ നേരത്തെ പുറത്തുവന്നിരുന്നു.

YOU MAY ALSO LIKE THIS VIDEO, ഇവർ സ്വന്തം കാലിൽ നിൽക്കുന്ന സംരംഭകരായ വീട്ടമ്മമാർ! കറി പൗഡർ നിർമ്മാണ യൂണിറ്റിലൂടെ നേടുന്നത്‌ മികച്ച മാസ വരുമാനം: ആർക്കും തുടങ്ങാം ഈ കറിപൗഡർ നിർമ്മാണ യൂണിറ്റ്‌