വ്യാഴം രാശി മാറുന്നു, എല്ലാ നല്ല കാര്യങ്ങളുടെയും കാരകനായ വ്യാഴത്തിന്റെ രാശിമാറ്റം ഏറെ ഗുണപ്രദമാകുന്നത്‌ ഈ നാളുകാർക്കാണ്‌

2021 നവംബർ 20 ശനിയാഴ്ച രാത്രി 11 മണി 31 മിനിട്ട് 20 സെക്കന്റ് മുതൽ കുംഭത്തിലേക്ക് രാശി മാറുന്ന വ്യാഴം അവിടെ 2022 ഏപ്രിൽ 13 വൈകിട്ട് 3 മണി 50 മിനിട്ട് 08 സെക്കന്റു വരെ തുടരും. താഴെപ്പറയുന്ന കൂറുകാർക്ക് ഈ വ്യാഴമാറ്റം ഉത്തമം ആയിരിക്കും. അതിൽ മിഥുനക്കൂർ, ചിങ്ങക്കൂർ, തുലാക്കൂർ എന്നിവർക്ക് വ്യാഴദൃഷ്ടി കൂടി ഉള്ളതിനാൽ ഏറ്റവും ശുഭപ്രദവുമായിരിക്കും.

മേടം (അശ്വതി, ഭരണി, കാര്‍ത്തിക 1/4)
ഇവർക്ക് വ്യാഴം ഏറ്റവും ഉത്തമ സ്‌ഥാനത്താകുന്നു. “പതിനൊന്നാം വ്യാഴത്തിന് കൊടുത്തുവെക്കേണ്ട” എന്നാണ് ചൊല്ല്. നല്ല ബന്ധങ്ങളുണ്ടാകും. ബിസിനസ് വിപുലപ്പെടുത്തും. കടങ്ങള്‍ നീങ്ങും. കുറെ നാളുകളായി വന്നു ഭവിച്ച സകല ദുരിതങ്ങള്‍ക്കും അവസാനമാകും. പിണങ്ങിയ ബന്ധുക്കൾ സഹായത്തിനായി വന്നുചേരും. പുതിയ ഭവനമോ വാസസ്ഥലമോ കൈവശമാകാനുള്ള ഭാഗ്യം സിദ്ധിക്കും. സന്താനങ്ങൾക്ക് ഉന്നതിയുണ്ടാകും. സഹോദര സ്‌ഥാനീയർക്ക് സുഖജീവിതവും പുതിയ തൊഴിലും ലഭിക്കും. ഇവരുടെ ജീവിതപങ്കാളിയിൽ നിന്നും അനവധി സന്തോഷകരമായ സമ്മാനങ്ങൾ ലഭിക്കും. സുഖദാമ്പത്യം ഫലത്തില്‍ വരും. മാനസികമായി സന്തോഷം അനുഭവിക്കാന്‍ യോഗമുണ്ടാകും. ആകെയൊരു മാറ്റം പ്രതീക്ഷിക്കണം. ധനം വന്നുചേരും. പുതിയ ജോലിയില്‍ പ്രവേശിക്കുകയോ പ്രമോഷനോ ലഭിക്കും. പുതിയ വാഹനം സ്വന്തമാക്കും. വിവാഹ കാര്യത്തില്‍ അനുകൂല തീരുമാനം വരും. രാഷ്ട്രീയമായും ഗുണമുണ്ടാക്കും. പുതിയ പദവികൾ ലഭിക്കും. പുതിയ സംരംഭങ്ങള്‍ ആരംഭിക്കാന്‍ കാലം അനുകൂലമാണ്. കോടതിവ്യവഹാരമുണ്ടെങ്കില്‍ വിജയം സുനിശ്ചിതം. ഭവനനിര്‍മ്മാണം, വസ്തുവകകള്‍ വാങ്ങല്‍, പുതിയ വാഹനം എന്നിവയ്ക്കും കാലം അനുകൂലം.

ഇടവം (കാര്‍ത്തിക3/4, രോഹിണി, മകയിരം 1/2)
പത്തിലെ വ്യാഴമാണ്. ശുഭപ്രദമായ കുറെ നാളുകൾക്കുശേഷം തിരിച്ചടികളും ലഭിക്കുന്ന കാലത്തിലേക്ക് കടക്കുകയാണ്. ഗ്രഹനിലയില്‍ പത്തിലെ വ്യാഴം ശോഭനവും ചാരവശാല്‍ പത്തിലെ വ്യാഴം തൊഴിൽപരമായി അശുഭവും ആകുന്നു. ഇത്, ചാരവശാല്‍ പത്തിലെ വ്യാഴകാലമാകയാൽ തൊഴിൽപരമായ കാര്യങ്ങളിൽ പ്രത്യേകം ശ്രദ്ധയുണ്ടായിരിക്കണം. കൃത്യമായ പ്രാർത്ഥനകൾ നടത്തിയാൽ ദോഷകാഠിന്യങ്ങളൊക്കെയും തരണം ചെയ്യാവുന്നതാണ്. ധനപരമായി തടസങ്ങൾ സംഭവിക്കുന്നതല്ല. എന്നാൽ തൊഴില്‍തടസമോ സ്തംഭനാവസ്‌ഥയോ അനുഭവത്തിൽ വരും. തൊഴിൽസ്‌ഥലത്ത്‌ പലവിധമായ അസ്വാരസ്യങ്ങൾ ഉടലെടുക്കും. പുതിയ തൊഴിൽ മേഖലകൾ തെരഞ്ഞെടുക്കാൻ പറ്റുന്ന ഒരു കാലമല്ല. ചെയ്യുന്നവ മേലധികാരികളുടെ അപ്രീതി കൂടിവരും. ജോലി നഷ്ടപ്പെട്ടാല്‍ പിന്നൊന്ന് ലഭിക്കാന്‍ കാലതാമസം വരുമെന്നതിനാല്‍ വളരെയേറെ ശ്രദ്ധിക്കേണ്ടതാകുന്നു. എന്നാല്‍ സര്‍ക്കാര്‍ സംബന്ധമായതും സ്വന്തമായി ആരംഭിച്ചു കഴിഞ്ഞതുമായ തൊഴിലുകൾ തടസ്സമില്ലാതെ നടന്നുപോകും. ഈ കാലയളവിൽ ആരംഭിക്കുന്ന സംരംഭങ്ങൾ കൃത്യമായ വ്യാഴപ്രീതി കർമ്മങ്ങളോടെ ചെയ്യാൻ പ്രത്യേകം ശ്രദ്ധിക്കണം. വഴക്കുകളില്‍ മദ്ധ്യസ്ഥത വഹിക്കുന്നതിനും കാലം അനുകൂലമായിരിക്കില്ല. ജീവിതപങ്കാളിയുടെ വരുമാനം കുറയാനുള്ള സാദ്ധ്യതകളുമുണ്ട്. വാഹനങ്ങൾ ശ്രദ്ധയോടെ കൈകാര്യം ചെയ്യണം. വിവാഹം പോലുള്ള മംഗളകര്‍മ്മങ്ങള്‍ അല്പം നീണ്ടുപോകുമെങ്കിലും അനുകൂല തീരുമാനമുണ്ടാകും.

മിഥുനം (മകയിരം 1/2, തിരുവാതിര, പുണര്‍തം 3/4)
വ്യാഴം ഒമ്പതില്‍ ഉത്തമസ്ഥാനത്തായി വന്നിരിക്കുന്നു. ഏറ്റവും ശുഭപ്രദമായ കാലമായിരിക്കും. പിതൃസ്‌ഥാനീയർക്ക് ഗുണദോഷപ്രദമായ കാലമായിരിക്കും. കുടുംബക്ഷേത്രങ്ങളിൽ പ്രധാന പങ്കുവഹിക്കാനുള്ള യോഗമുണ്ടാകും. സകുടുംബമായി കുടുംബക്ഷേത്രദർശനത്തിന് ഭാഗ്യമുണ്ടാകും. വിദേശരാജ്യത്ത് ഇഷ്ടതൊഴിൽലാഭവും, സന്താനങ്ങളെക്കൊണ്ട് സന്തോഷം, ധനയോഗം എന്നിവയാല്‍ അനുഗ്രഹിക്കപ്പെടും. ദാമ്പത്യപരമായി സുഖവും സന്തോഷവും സംജാതമാകും. തൊഴിലില്‍ പുരോഗതി, പ്രമോഷന്‍, സാമ്പത്തികമെച്ചം എന്നിവയും അനുഭവത്തില്‍ വരുന്നതാണ്. നല്ലവരുമായുള്ള സഹവാസം, വിവാഹകാര്യങ്ങളിലും, പുതിയ ഭവനം, വസ്തു, വാഹനം എന്നിവയിലും സന്തോഷവാര്‍ത്തയ്ക്ക് യോഗം കാണുന്നു. വിദേശയാത്രയ്ക്ക് കാലം അനുകൂലമാണ്. ഈ വ്യാഴമാറ്റം ഇവർക്ക് ഭാഗ്യദായകമായിരിക്കും. ശത്രുക്കൾക്ക് തിരിച്ചടി ലഭിക്കുന്ന കാലമാണ്. ധനപരമായ കാര്യങ്ങളിൽ ഉന്നതി. ചില കാര്യങ്ങളിൽ മദ്ധ്യസ്‌ഥത വഹിക്കാനുള്ള യോഗവും ലഭിക്കുന്നതാണ്. എന്നാൽ അഷ്‌ടമശ്ശനിയു‌ടെ കാഠിന്യത്താൽ രോഗാദിക്ലേശങ്ങൾ സംഭവിക്കാൻ സാദ്ധ്യത കൂ‌ടുതലാകുന്നു.

കര്‍ക്കിടകം (പുണര്‍തം 1/4, പൂയം, ആയില്യം)
ഇവര്‍ക്ക് വ്യാഴം അഷ്ടമത്തിലും ഏഴിൽ കണ്ടകശനിയുമാകുന്നു. പൊതുവെ ദോഷപ്രദമായി പറയുമെങ്കിലും അഷ്ടമത്തിൽ വ്യാഴം സഞ്ചരിക്കുമ്പോൾ വിവാഹനിശ്ചയം, വിവാഹം, ഗൃഹപ്രവേശം, ധനാഗമം എന്നിവയ്ക്കും യോഗമുണ്ടാകും. രോഗാദിക്ലേശവും അലച്ചിലും വലച്ചിലുമുണ്ടാകും. പങ്കാളിയുമായുള്ള പിണക്കം കൂടുതൽ നീട്ടിക്കൊണ്ടുപോകരുത്. രോഗവും അനിയന്ത്രിതമായ മാനസികസമ്മർദ്ദവും സംഭവിക്കും. ധന, സ്വർണ്ണാഭരണകാര്യങ്ങളിൽ തർക്കവും വഴക്കുകളും സംഭവിക്കും. തൊഴില്‍സ്ഥലം മാറേണ്ടതായ പല ഘട്ടങ്ങളും സംജാതമാകും. തൊഴിലിൽ തുടരാൻ കഴിയുമെങ്കിൽ അതാകും ശുഭപ്രദം. സര്‍ക്കാര്‍ ജോലിസംബന്ധമായി ചില ശുഭവാര്‍ത്തകള്‍ക്ക് യോഗം. അപ്രതീക്ഷിതമായി തൊഴില്‍ മാറ്റമുണ്ടാകും. എന്നാൽ തൊഴിലില്‍ ഉന്നതിയിലെത്തും. സകുടുംബമായുള്ള വിദേശയാത്ര സംഭവിക്കുന്നതാണ്. സാമ്പത്തിക ബാദ്ധ്യത പിടിച്ചുനിര്‍ത്താന്‍ കഴിയാതെ വിഷമിക്കും. കുടുംബാംഗങ്ങള്‍ക്ക് ഓരോരോ അസുഖങ്ങള്‍ മാറിമാറി വന്നുകൊണ്ടിരിക്കും. കാര്യങ്ങളെല്ലാം കയ്യില്‍ നില്‍ക്കാത്ത സ്ഥിതിയുണ്ടാകും. ബന്ധുക്കള്‍ ശത്രുക്കളാകും. ശത്രുക്കള്‍ അവസരം നോക്കി ദ്രോഹിക്കും. നല്ല സൗഹൃദങ്ങള്‍ മനസ്സിന് കുളിര്‍മ്മയേകും. വഴക്കും അതുവഴിയുള്ള മാനസിക പിരിമുറുക്കവും കൂടി വരാതെ പ്രത്യേകം ശ്രദ്ധിക്കണം. രോഗങ്ങളും ചെലവുകളും കൊണ്ട് മാനസികമായി തളരും. ഭാഗ്യഹാനി സംഭവിക്കുന്നതായി എപ്പോഴും ചിന്തയുണ്ടാകും. പിതൃസ്ഥാനീയര്‍ക്ക് രോഗാദിക്ലേശങ്ങള്‍ക്ക് സാദ്ധ്യത. കുടുംബത്ത് വിവാഹസംബന്ധമായി ശുഭവാര്‍ത്തകള്‍ക്ക് യോഗം. ഭവനവുമായി ബന്ധപ്പെട്ട കാര്യങ്ങൾ തടസമില്ലാതെ മുന്നോട്ട് നീങ്ങും.

ചിങ്ങം (മകം, പൂരം, ഉത്രം 1/4)
ഏഴിലെ വ്യാഴവും ആ‌റിലെ ശനിയും ഉത്തമം ആയിരിക്കും. ശാരീരികക്ലേശങ്ങൾ നീങ്ങും. സഹോദരങ്ങൾക്ക് സന്തോഷവാർത്തയ്ക്ക് യോഗവും കാണുന്നു. പങ്കാളിക്ക് ശാരീരികസുഖവും ഭാഗ്യവും ലഭിക്കും. കുറെ നാളുകളായി സംഭവിച്ചുകൊണ്ടിരുന്ന കഷ്ടതകൾക്കും ക്ലേശങ്ങൾക്കും അവസാനമാകും. ഇനി ഭാഗ്യദായകമായ നാളുകളായിരിക്കും. അതീവ ഗുണപ്രദമായ കാലം. മുടങ്ങിക്കിടന്ന സകലതും പുനരാരംഭിക്കും. സര്‍വ്വൈശ്വര്യം ഫലത്തില്‍ വരും. ബന്ധുക്കളുമായുള്ള ശത്രുത കുറയും. എതിര്‍ത്ത് സംസാരിച്ചവര്‍ അനുകൂലമായി സംസാരിക്കുന്നതുകണ്ട് ആശ്ചര്യപ്പെടും. കേസുകള്‍ അനുകൂലമായി വരും. പ്രേമസാഫല്യമുണ്ടാകും. കളത്രദുരിതം മാറി, ഉത്തമദാമ്പത്യം ലഭിക്കും. വിശ്വസ്തരായ ജോലിക്കാരെ ലഭിക്കും. പണം പെരുകും. ദീര്‍ഘകാലമായി ആഗ്രഹിച്ചിരുന്ന ദൂരെയുള്ള ചില ദേവാലയങ്ങള്‍ സന്ദര്‍ശിക്കും. ദൂരയാത്രകൾ ഫലത്തിൽ വരും. പുതിയ സംരംഭങ്ങള്‍ ആരംഭിക്കുകയും അതിന്റെ വിജയത്തില്‍ ആഹ്ലാദിക്കുകയും ചെയ്യും. വിദേശത്തോ സ്വദേശത്തോ തൊഴിൽ ലഭിക്കാനുള്ള തടസങ്ങൾ നീങ്ങും. ഭവന നിർമ്മാണം തടസമില്ലാതെ നടക്കും. പൊതുവെ സന്തോഷപ്രദമായ കാലമായിരിക്കും. വിവാഹകാര്യം, പങ്കാളിത്ത കച്ചവടം എന്നിവ ഗുണപ്രദമായി ഭവിക്കും. ഇവർ ദോഷപരിഹാരം ചെയ്യേണ്ടതില്ല.

കന്നി (ഉത്രം 3/4, അത്തം, ചിത്തിര1/2)
ആറിലെ വ്യാഴം ശത്രുവര്‍ദ്ധനയുണ്ടാക്കും. രോഗവും ആശുപത്രിവാസവുമുണ്ടാക്കും. തൊഴില്‍പരമായും ശാരീരികമായും കഷ്ടതകള്‍ അനുഭവിക്കേണ്ടി വരും. തൊഴിൽ നഷ്ടം സംഭവിക്കാതെ ശ്രദ്ധിക്കണം. തൊഴിൽ, ഉന്നത വിദ്യ എന്നിവ തടസ്സമില്ലാതെ തുടരും. ശത്രുക്കളുടെ എണ്ണം ദിവസംപ്രതി കൂടുന്നത് എങ്ങനെയെന്ന് അതിശയിച്ചു പോകും. രക്തബന്ധുക്കള്‍, സഹോദരങ്ങള്‍ എന്നിവരില്‍നിന്നും തിക്താനുഭവങ്ങള്‍ പ്രതീക്ഷിക്കണം. ശത്രുക്കളെ വര്‍ദ്ധിപ്പിക്കരുത്. ആശുപത്രിവാസത്തിന് സാദ്ധ്യത വളരെക്കൂടുതലാണ്. കേസുകളും വഴക്കുകളും കോടതി വ്യവഹാരവും സ്വസ്ഥത നശിപ്പിക്കും. കോടതി വഴിയുള്ള കാര്യങ്ങളെല്ലാം അവതാളത്തിലാകും. അപ്രതീക്ഷിതമായി ധനപരമായ കാര്യങ്ങൾ നല്ല രീതിയിൽ എത്തുന്നത് ആശ്വാസമായി ഭവിക്കും. രോഗാദിക്ലേശങ്ങള്‍ കൂടുതലായി അനുഭവപ്പെടും. എന്നിരിക്കിലും കുടുംബത്ത് വിവാഹം, സത്പുത്രഭാഗ്യം, വിദേശഗമനം, മറ്റ് വിശേഷചടങ്ങുകള്‍ എന്നിവയ്ക്ക് അനുകൂലസമയവുമാകുന്നു. വസ്തു വാങ്ങല്‍, ഭവനനിര്‍മ്മാണം എന്നിവയും അനുഭവത്തിൽ വരുന്നതായിരിക്കും. വിവാഹ നിശ്ചയം, വിവാഹം എന്നിവയ്ക്കും അനുകൂലമായ കാലമായിരിക്കും.

തുലാം (ചിത്തിര 1/2, ചോതി, വിശാഖം 3/4)
വ്യാഴം അഞ്ചിലാണ്. ഇത് ഉത്തമസ്ഥാനമാകുന്നു. കുടുംബത്ത് ഉണ്ടായിരുന്ന വഴക്കുകളും ദാമ്പത്യ പ്രശ്നങ്ങളും അവസാനിക്കും. നടക്കാതെ പോയ പല പദ്ധതികളും ഇപ്പോള്‍ പ്രാബല്യത്തിലാകും. അവാർഡ്, പ്രമോഷൻ, ഉന്നതവിജയം എന്നിവയ്ക്കും കാലം അനുകൂലം. വസ്തു, ഭവനം, വാഹനം എന്നിവയില്‍ ഭാഗ്യം ലഭിക്കുന്നതാണ്. സന്താനങ്ങളുടെ കാര്യത്തിൽ മാനസിക പിരിമുറുക്കമുണ്ടാകും. സന്താനങ്ങളുടെ രോഗാദിക്ലേശങ്ങളില്‍ വിഷമവും സംഭവിക്കാന്‍ ന്യായം കാണുന്നു. ദാമ്പത്യബന്ധങ്ങളുടെ കാര്യത്തിൽ ഈശ്വരകൃപയാല്‍ സന്തോഷം ലഭിക്കും. വിവാഹ കാര്യത്തില്‍ അനുകൂലതീരുമാനം. പിണക്കങ്ങൾ നീങ്ങി എല്ലാ ബന്ധുമിത്രാദികളും സ്നേഹത്തോടെ ഇടപഴകും. കുടുംബത്ത് പൊതുവേ സന്തോഷവും സമാധാനവും ഉണ്ടാകും. പുതിയ വസ്തുവകകള്‍ വാങ്ങാനുള്ള അവസരവും സംജാതമാകും. വിദേശയാത്രാതടസവും നീങ്ങും. വിദ്യാഭ്യാസം നല്ല നിലയില്‍ തുടരും. പരീക്ഷകളില്‍ വിജയം നേടും. തൊഴില്‍പരമായ കാര്യങ്ങളില്‍ സന്തോഷവാര്‍ത്തയ്ക്ക് യോഗം. സര്‍ക്കാരുമായി കരാറില്‍ ഏര്‍പ്പെടും. നല്ല സൗഹൃദങ്ങള്‍, ഉത്തമ ബന്ധങ്ങള്‍ എന്നിവ മനസിന് ബലം നല്‍കും. കുടുംബത്ത് പലവിധമായ ശുഭകര്‍മ്മങ്ങള്‍ക്കും സാക്ഷ്യം വഹിക്കും. ഭാഗ്യത്തിന്റെ ആനുകൂല്യം ലഭിക്കുക തന്നെ ചെയ്യും. വിദേശയാത്രയുടെ ബന്ധപ്പെട്ട എല്ലാ തടസങ്ങളും നീങ്ങുന്നതാണ്. ഉന്നത പഠനത്തിനുള്ള ഭാഗ്യവും ഉണ്ടാകും. തൊഴിൽപരമായി ഏറ്റവും അനുകൂലമായ കാലമാണ്. പൊതുപ്രവർത്തനം, ബാങ്ക്, ഇൻഷുറൻസ് എന്നീ മേഖലകളിൽ പ്രവർത്തിക്കുന്നവർക്കും കാലം അനുകൂലം. മുടങ്ങിക്കിടന്ന പല സാമ്പത്തിക ഇടപാടുകളും അനുകൂലമായി വരും. പോലീസ്, കോടതി വ്യവഹാരങ്ങളിൽ വിജയിക്കും. പൊതുവെ അനുകൂലമായ കാലമായിരിക്കും.

വൃശ്ചികം (വിശാഖം1/4, അനിഴം, തൃക്കേട്ട)
ഇവർക്ക് വ്യാഴം ചാരവശാല്‍ നാലിലാകുന്നു. ചാരവശാൽ നാലിലെ വ്യാഴം അതീവ ദോഷപ്രദമാകുന്നു. മാതൃസ്‌ഥാനീയർക്കും വാഹന സംബന്ധമായ കാര്യങ്ങളിലും പ്രത്യേക ശ്രദ്ധ ഉണ്ടായിരിക്കണം. തൊഴിൽപരമായ കാര്യങ്ങൾ മുടക്കമില്ലാതെ മുന്നോട്ടുപോകും. എന്നാൽ വാഹനങ്ങളും യന്ത്രങ്ങളും കൈകാര്യം ചെയ്തു തുടങ്ങുമ്പോള്‍ ഈശ്വരഭജനം നടത്തുക തന്നെ വേണം. കുടുംബത്ത് പൊതുവേ അസ്വാരസ്യങ്ങള്‍ കടന്നുവരും. ജീവിത പ്രയാസങ്ങള്‍ തലപൊക്കും. കുടുംബബന്ധങ്ങളില്‍ വിള്ളല്‍ വീഴാതെ ശ്രദ്ധിക്കുക വളരെ ശ്രമകരമായിരിക്കും. തൊഴിൽ വിജയം ഉണ്ടാകുന്നതാണ്. സാമ്പത്തിക ചെലവ് കൂടും. സാമ്പത്തിക ചെലവുള്ള പുതിയ സംരംഭങ്ങൾ ഇപ്പോൾ ആരംഭിക്കുന്നത് ശുഭകരമല്ല. കേസുകളിലും വഴക്കുകളിലും ജാമ്യത്തിലും ഉള്‍പ്പെടുന്നത് ഒഴിവാക്കണം. ജീവിതപങ്കാളിക്ക് ദൂരെദേശയാത്ര ഫലത്തിൽ വരും. മാതൃസ്ഥാനീയര്‍ക്ക് ദു:ഖവും മാനസിക പിരിമുറുക്കവും ഉണ്ടാകുന്നതാണ്. അനാവശ്യമായ കൂട്ടുകെട്ടുകളിൽ നിന്ന് ഒഴിഞ്ഞു നിൽക്കാൻ ശ്രമിക്കണം. ഇല്ലെങ്കിൽ മാനസിക പ്രയാസം കൂടുതലായി അനുഭവിക്കേണ്ടി വരും. വിദ്യാഭ്യാസ കാര്യത്തില്‍ പുരോഗതിയുണ്ടാകും. വിദേശയാത്ര തൊഴില്‍ വിജയത്തിലെത്തുന്നത് ആശ്വാസമാകും. ജന്മനക്ഷത്ര ദിവസങ്ങളിലും വ്യാഴാഴ്ചകളിലും മഹാവിഷ്ണു ക്ഷേത്രത്തിൽ രാവിലെ സംവാദസൂക്തപുഷ്‌പാഞ്‌ജലി നടത്തുന്നതും നിത്യവും മൃത്യുഞ്ജയമന്ത്രം പകല്‍നേരം ഭക്തിയോടെ ജപിക്കുന്നതും ഉത്തമം ആകുന്നു. മഹാവിഷ്ണുവിന് രാജഗോപാലാര്‍ച്ചന (വിദ്യാര്‍ത്ഥികള്‍ക്ക് വിദ്യാരാജഗോപാലാര്‍ച്ചന), സംവാദസൂക്താര്‍ച്ചന എന്നിവ ജന്മനക്ഷത്ര ദിവസങ്ങളില്‍ നല്‍കി പ്രാര്‍ത്ഥിക്കണം.

ധനു (മൂലം, പൂരാടം, ഉത്രാടം 1/4)
മൂന്നിലെ വ്യാഴം മുറവിളി കൂട്ടും’ എന്ന് പറയാറുണ്ട്‌. ഭവനമോ താമസമോ തൊഴിൽസ്‌ഥലമോ മാറാന്‍ സാദ്ധ്യതയുണ്ട്. ദൂരെദേശങ്ങളിലെ തൊഴില്‍ ലഭിക്കുന്നതാണ്. മൂന്നിലെ വ്യാഴം പൊതുവെ പ്രതികൂലമായിരിക്കും. വയർ സംബന്ധമായ അസുഖങ്ങൾ ആരംഭിക്കും. ജലം, അഗ്നി എന്നിവയാൽ ക്ലേശമുണ്ടാകാനും സാദ്ധ്യത. ധനപരമായി വളരെയേറെ ക്ലേശപ്രദമായ കാലമായിരിക്കും. പിതൃസ്‌ഥാനീയർക്ക് രോഗാദിക്ലേശവും രോഗശമനവും ഉണ്ടാകുന്നതാണ്. ഭവനം, തൊഴിൽ സ്‌ഥലം എന്നീ സ്ഥലങ്ങളിൽ അഗ്നിമൂലം വിഷമതകൾ സംഭവിക്കാമെന്നതിനാൽ വളരെയേറെ ശ്രദ്ധിക്കണം. ഇവര്‍ക്കോ കുടുംബത്തോ അടുത്ത ബന്ധുമിത്രാദികള്‍ക്കോ വിവാഹം പോലുള്ള ശുഭകര്‍മ്മങ്ങള്‍ നടക്കുന്നതുമാണ്. ആവശ്യമില്ലാത്ത സകല കാര്യങ്ങളിലും ചെന്ന് അവസാനം അബദ്ധമായെന്ന് മുറവിളി കൂട്ടുന്ന കാലമാകുന്നു. കോടതിയുമായി ബന്ധപ്പെട്ട് സമയ നഷ്ടവും ധനനഷ്ടവുമുണ്ടാകും. സര്‍ക്കാര്‍ ഉദ്യോഗവുമായി ബന്ധപ്പെട്ട് അനുകൂലമായ തീരുമാനങ്ങളുണ്ടാകും. വിവാഹ സാക്ഷാത്കാരം നടക്കുന്ന കാലവും ആകുന്നു. തൊഴില്‍ മാറുന്നതിന് അനുകൂലമായ കാലമായിരിക്കില്ല, എന്നാൽ തൊഴിൽ സ്‌ഥലം മാറും. ഇപ്പോള്‍ ചെയ്തു കൊണ്ടിരിക്കുന്ന തൊഴില്‍ തല്‍ക്കാലം തുടരുന്നതായിരിക്കും നല്ലത്. കുടുംബത്ത് മംഗളകര്‍മ്മങ്ങള്‍ നടക്കാനും ന്യായം കാണുന്നു. മൂന്നിൽ വ്യാഴം ചാരവശാൽ സഞ്ചരിക്കുന്ന കാലത്ത് വിവാഹനിശ്ചയം, വിവാഹം എന്നിവയുമുണ്ടാകും.

മകരം (ഉത്രാടം 3/4, തിരുവോണം, അവിട്ടം 1/2)
വ്യാഴം രണ്ടിലാണ്. ഏറ്റവും അനുകൂലമായ കാലം. വാക്കുകൾ ഏറ്റവും ലാളിത്യത്തോടെയും ബഹുമാനത്തോടെയുമാകും. തൊഴിലും ആയുരാരോഗ്യസൗഖ്യവും സംജാതമാകും. വിദ്യാവിജയവും നല്ല തൊഴിലും ലഭിക്കും. രണ്ടിലെ വ്യാഴം ഏറ്റവും നല്ല ഫലങ്ങള്‍ നല്‍കും. എന്നാൽ ജന്മശ്ശനിക്കാലമാണെന്ന ചിന്തയും ഉണ്ടായിരിക്കണം. മുടങ്ങിക്കിടന്ന കാര്യങ്ങള്‍ ശുഭപ്രദമായി ആരംഭിച്ച് വിജയിപ്പിക്കാന്‍ സാധിക്കും. വിദേശയാത്രാ തടസങ്ങള്‍ നീങ്ങുന്നതാണ്. കുടുംബത്ത് ശുഭകര്‍മ്മങ്ങള്‍ നടക്കും. കഷ്ടപ്പാടുകള്‍ വിട്ടൊഴിയും. ധനപരമായി അനുകൂലമായ കാലമായിരിക്കും. വാക്കുകള്‍ സൂക്ഷിച്ച് ഉപയോഗിക്കും. എല്ലാം തടസമില്ലാതെ ലഭിക്കും. പുതിയ നല്ല നല്ല ബന്ധങ്ങള്‍ അനുഭവത്തില്‍ വരും. വിവാഹകാര്യത്തില്‍ തീരുമാനമാകും. ധനം, തൊഴില്‍, പ്രമോഷന്‍, ആഹാരം, കോടതി വിജയം എന്നിവ അനുകൂലമായി വരുന്നതില്‍ അഭിമാനിക്കും. പങ്കാളിയുമായുള്ള പിണക്കങ്ങൾ നീങ്ങും. കുടുംബത്ത് സുഖവും സന്തോഷവും ഉടലെടുക്കും. ആശുപത്രി സംബന്ധമായ കാര്യങ്ങളിൽ വേഗം പരിഹാരമാകും. പുതിയ വസ്തുവകകൾ വാങ്ങുകയോ ഭവന നിർമ്മാണമോ ഗൃഹപ്രവേശമോ ഉണ്ടാകും. ഇവര്‍ക്ക് വ്യാഴം അനുകൂലമാകയാൽ മറ്റ് ദോഷപരിഹാരങ്ങൾ ആവശ്യമില്ല. എന്നാൽ ശനിദോഷപരിഹാരമായി ശാസ്താവിന് നെയ്‌വിളക്ക് ശനിയാഴ്ചകളിൽ നൽകി പ്രാർത്ഥിക്കണം.

കുംഭം (അവിട്ടം 1/2, ചതയം, പൂരൂരുട്ടാതി 3/4)
ഇവർക്ക് ജന്മരാശിയില്‍ നില്‍ക്കുന്ന വ്യാഴവും അതോടൊപ്പം ഏഴരശ്ശനിക്കാലവും ആകുന്നു. പൊതുവെ തടസങ്ങളുടെയും നിർഭാഗ്യതയുടെയും കാലമായിരിക്കും. ആരോഗ്യകാര്യങ്ങളില്‍ പ്രത്യേക ശ്രദ്ധ ആവശ്യമായി വരും. ക്ഷതമോ രോഗങ്ങളോ വരാതെ ശ്രദ്ധിക്കണം. സകല ശുഭകര്‍മ്മങ്ങള്‍ക്കും തടസമുണ്ടാകുന്നതായി തോന്നും. നിർമ്മാണ പ്രവർത്തനങ്ങൾ പൊതുവെ ദോഷപ്രദമോ നീണ്ടുപോകുന്നതോ ആയി അനുഭവപ്പെടും. പുതിയ സംരംഭങ്ങള്‍ക്ക് അനുകൂലമായ കാലമല്ല. എന്നാൽ വിദ്യാർത്ഥികൾക്ക് കാലം അനുകൂലമായി മുന്നോട്ടുപോകുന്നതാണ്. തൊഴിൽപരമായും ദോഷങ്ങൾ സംഭവിക്കുകയില്ല. എന്നാൽ ആരോഗ്യപരമായ കാര്യങ്ങളിൽ വളരെയേറെ ശ്രദ്ധിക്കണം. നിത്യവും വ്യായാമം ചെയ്യാൻ ശ്രമിക്കണം. പുതിയ വസ്തു, വാഹനം എന്നിവ വാങ്ങാന്‍ അനുകൂല സമയമല്ല. അസമയത്തെ അന്യഭവന സന്ദര്‍ശനവും സ്വന്തം വീട്ടിലെ അനാവശ്യ വിരുന്നുസൽക്കാരങ്ങളും അത്യാവശ്യമില്ലാത്ത യാത്രകളും കഴിവതും ഒഴിവാക്കണം. വിദേശയാത്ര നീണ്ടുപോകാതിരിക്കാൻ മഹാവിഷ്‌ണു, ശാസ്താപ്രീതി കർമ്മങ്ങൾ ചെയ്ത് പ്രാർത്ഥനയോടെ കാര്യങ്ങൾ നീക്കണം. പൊതുവെ അനുകൂലമല്ലാത്ത കാലമാകയാൽ അടുത്ത വ്യാഴമാറ്റംവരെ ദോഷപരിഹാരം ചെയ്യേണ്ടതാകുന്നു.

മീനം (പൂരൂരുട്ടാതി1/4, ഉത്രട്ടാതി, രേവതി)
വ്യാഴം പന്ത്രണ്ടില്‍ സ്ഥിതിയാകയാല്‍ അത്യധികമായ ചെലവുകളാല്‍ വിഷമിക്കും. വരവിനേക്കാൾ ചെലവ് സംഭവിക്കുന്നതോർത്ത് വിഷമിക്കും. മുതലുകള്‍ മോഷണം പോകാനും ന്യായമുണ്ട്. ഇപ്പോള്‍ ചെയ്യുന്ന തൊഴില്‍ നഷ്ടപ്പെടുത്തിയാല്‍ ഈ വ്യാഴമാറ്റക്കാലവും തുടർന്നുള്ള ജന്മരാശിയിലെ വ്യാഴവും ചേർന്നുവരുന്ന രണ്ട് വര്‍ഷക്കാലം വലിയ രീതിയിൽ അലയേണ്ടി വരും അതിനാല്‍ തൊഴില്‍സ്ഥലത്ത് എപ്പോഴും ശ്രദ്ധയുണ്ടായിരിക്കണം. അനാവശ്യമായ യാത്രകള്‍ വേണ്ടിവരും. അങ്ങനെയും ധനനഷ്ടം സംഭവിക്കും. കുടുംബത്ത് പുതിയ വാഹനം വാങ്ങാനുള്ള യോഗമുണ്ട്. വീട്, വസ്തു എന്നിവയുമായി ബന്ധപ്പെട്ട് നൂതന ആശയങ്ങളും അതുമായി മുന്നോട്ടു പോകുകയും ചെയ്യും. ഭവനനിർമ്മാണം ഫലപ്രാപ്തിയിലെത്തും. അതുവഴി ധനനഷ്ടമുണ്ടാകാതെ ശ്രദ്ധിക്കണം. കുടുംബത്ത് വിവാഹം, സന്താനങ്ങളുടെ മംഗളകർമ്മം, ഗൃഹപ്രവേശം എന്നീ ശുഭകരമായ പല കര്‍മ്മങ്ങള്‍ നടക്കാനും സാദ്ധ്യത കൂടുതലാണ്. പൊതുവേ മോശമായ അവസ്ഥയിലൂടെ കടന്നുപോകേണ്ടിയും വരും. ഇപ്പോഴുള്ള തൊഴില്‍ മാറാന്‍ ശ്രമിക്കുന്നത് ദോഷപ്രദമായി ഭവിക്കും. ദോഷപരിഹാരമായി മഹാവിഷ്ണുക്ഷേത്രത്തില്‍ നെയ്‌വിളക്ക്, പാല്‍പ്പായസം, തുളസിമാല എന്നിവ നല്‍കി പ്രാര്‍ത്ഥിക്കണം. ക്ഷേത്രത്തില്‍ പോകാന്‍ കഴിയാത്തവര്‍ ദിവസം മൂന്ന് നേരം സമ്മോഹന ഗോപാലമന്ത്രം ഭക്തിയോടെ ജപിക്കുന്നതും അത്യുത്തമമാകുന്നു.

അനിൽ വെളിച്ചപ്പാടൻ
ഉത്തരാ ജ്യോതിഷ ഗവേഷണകേന്ദ്രം, കരുനാഗപ്പള്ളി