വിപണിയിൽ ഇന്ന് ലഭ്യമാകുന്ന ജ്യൂസും സോഫ്റ്റ് ഡ്രിങ്കുകളും കൂടുതൽ സ്വാദിഷ്ടമാക്കാൻ അവയിൽ കൃത്രിമ ചേരുവകൾ ചേർക്കാറുണ്ട്‌. പക്ഷെ, നാടൻ രീതിയിൽ നിരവധി പാനീയങ്ങൾ നമ്മുടെ വീടുകളിൽ ഉണ്ടാക്കാറുണ്ട്‌. ആരോഗ്യത്തിന്‌ ഹാനികരമല്ലാത്തതും പോഷകദായകവുമാണ്‌ അവയെല്ലാം. അത്തരത്തിലുള്ള രണ്ട്‌ തനി നാടൻ ജ്യൂസുകൾ പരിചയപ്പെടാം. ഈ രുചി നിങ്ങൾക്ക് മുൻപ് പരിചയം ഉണ്ടാവില്ല! കരിക്കിൻ വെള്ളം കുടിക്കും കരിക്ക് കഴിക്കും. എന്നാൽ ഇതേ കരിക്ക് ജ്യൂസ് ആക്കി കുടിച്ചാലോ? ഒന്നു രുചിച്ചു നോക്കൂ, പിന്നെ ഇതേ കഴിക്കൂ!
കരിക്കിന്‍ ജ്യൂസ്
ചേരുവകള്‍:
ഇളം കരിക്ക് – 1 എണ്ണം
പഞ്ചസാര – 1 ടേബിള്‍ സ്പൂണ്‍
കരിക്കിൻ വെള്ളം – ആവശ്യത്തിന്
ഐസ് ക്യൂബ് – ആവശ്യത്തിന്
തയാറാക്കുന്ന വിധം:
കരിക്കിനുള്ളിലെ തേങ്ങ ചെറിയ കക്ഷണങ്ങളാക്കി എടുക്കുക. തേങ്ങാ കഷണങ്ങളോടൊപ്പം കരിക്കിന്‍ വെള്ളവും പഞ്ചസാരയും ചേര്‍ത്ത് ജ്യൂസറില്‍ അടിക്കുക. അരിച്ചെടുത്ത കരിക്കിന്‍ ജ്യൂസില്‍ ഏതാനും ഐസ് ക്യൂബുകള്‍ ഇട്ട് തണുപ്പിച്ച ശേഷം കഴിക്കുക.
അവല്‍-പഴം ജ്യൂസ്
ചേരുവകള്‍:
തേങ്ങാ പാല്‍ – 1 ക്ളാസ്
അവല്‍ – 4 ടേബിള്‍ സ്പൂണ്‍
ഞാലിപൂവന്‍ പഴം – 2 എണ്ണം (കനംകുറച്ച് വട്ടത്തില്‍ അരിഞ്ഞത്)
പഞ്ചസാര – 1 ടേബിള്‍ സ്പൂണ്‍
തയാറാക്കുന്ന വിധം:
തേങ്ങ ചിരകി പാല്‍ പിഴിഞ്ഞ് അരിച്ചെടുക്കുക. പാലില്‍ പഞ്ചസാര ചേര്‍ത്ത് നന്നായി ഇളക്കുക. അര ഗ്ളാസ് പാല്‍ എടുത്ത ശേഷം അതിലേക്ക് അവലും പഴവും ചേര്‍ക്കുക. ആവശ്യമായ പാല്‍ കൂടി ചേര്‍ത്ത് നന്നായി ഇളക്കിയ ശേഷം ജ്യൂസ് കഴിക്കുക.